तुमच्या विचारांचा परिणाम तुमच्या कृतींवर होतो !

     अनेकदा असं होतं की आपल्याला खूप काही गोष्टी करायच्या असतात. त्यासाठी लागणारी पुरेशी क्षमता आपल्याकडे असते.तरीही आपल्याला त्या गोष्टी काही केल्या जमत नाहीत आणि या न जमण्याची आपण कळत नकळत खूप कारणे शोधून काढतो. मग त्यामध्ये परिस्थिती कशी अनुकूल नव्हती , साधने कशी उपलब्ध नव्हती, माझी क्षमता कमी पडली आणि सर्वात महत्वाचे ती गोष्ट करायची माझी पात्रता नाही.                                                                     इथून खरया अर्थाने विचार आणि कृतींच्या खेळाला सुरुवात होते.जेव्हा आपल्याला हे समजतं तेव्हा आपल्या लक्षात येते की जी कारणे आपण देत होतो परिस्थितीची ,साधनांची ,क्षमतांची ती सर्व आपण स्वतः निर्माण केलेली असतात. जेव्हा आपण म्हणतो अमुक एक गोष्ट करायची माझी पात्रता नाही ,तेव्हा प्रश्न हा निर्माण होतो की ज्या गोष्टी करायला अजुन सुरुवातच केली नाही त्यासाठी लागणारी पात्रता आहे की नाही हे ठरवलं कसं ?  हे फक्त दोनच शक्यतांमुळे होऊ शकते जेव्हा खरचं क्षमता नसते किंवा दुसरयांच्या बोलण्याचा किंवा विचारांचा आपल्यावर झालेला परिणाम .एखादी गोष्ट करताना आजूबाजूच्या लोकांकडून म्हटलं जात की का करताय ,तुम्हाला जमेल का ? सातत्याने या गोष्टी ऐकल्यावर एका टप्यावर वाटतं की  खरच आपल्यासाठी हे  नाही .या एका विचारासरशी पुढे अनेक नकारात्मक विचारांचे जाळे निर्माण होते आणि काहीतरी  करण्यासाठी ज्या कल्पना सुचाव्या लागतात त्यांचा मार्ग बंद केला जातो .परिणामी आलेल्या संधी ,त्यासाठी लागणारी परिस्थिती सर्व असूनही आपल्याला काही करता येत नाही.
            याउलट जेव्हा आपल्याला आपल्या क्षमतांची पुरेपूर जाणीव असते दुसरयांच्या विचारांचा फारसा प्रभाव पडत नाही तेव्हा आपण आपल्या विचारांना खुली वाट करून देतो, नवनवीन कल्पना सुचतात ,संधी शोधण्यासाठी जाणीवपूर्वक प्रयत्न केले जातात आणि परिस्थिती सुद्धा अनुकूल बनते.
             त्यामुळे जेव्हा एखादी गोष्ट आपल्याला जमत नाही तेव्हा एकदा विचार करा कि हे बाहेरच्या घटकांमुळे घडले कि आपल्या विचारांमुळे.कारण आपल्या विचारांचा परिणाम आपल्या कृतींवर होत असतो ....