गोंधळ भूमिकांचा

   Mr. राणे यांना खूप राग आला होता. त्याला कारणही होत. झालं असं, की राणे हे एका शाळेत गणिताचे शिक्षक. त्यांची त्या विषयावरची पकड पण मजबूत. त्याचबरोबर त्यांचा अनुभव, त्यांचं शिकवण सर्वच कस नीट, समजण्याजोग. पण त्यांची आताची अवस्था काहीशी दिव्याखाली अंधार अशी झालेली. दिव्याखाली अंधार म्हणण्याचं कारण अस की ते ज्या विषयात इतके हुशार त्याच्या नेमक उलटा त्यांचा मुलगा प्रवीण. त्याला गणित हा विषय आवडतही नाही आणि म्हणावा तसा समजतही नाही. इथून खरी समस्येला सुरुवात होते. राणेंना राग येण्याचं कारणही हेच होत. आपण ज्या विषयात पारंगत आहोत त्याबद्द्ल मुलाला जरासुद्धा आस्था असू नये हे काही त्यांना पटत नाही. 

  मग काय, सुरू होतो त्याला गणित शिकवण्याचा अट्टाहास. पण काही केल्या त्यांच्या प्रयत्नांना यश येत नसत. बरं विषयातील काही माहीत नाही अस नाही . तरीही अस का होतय? आपला मुलगा आपलं का ऐकत नाही हे त्यांना समजत नसत आणि त्यातून त्यांची चिडचिड अजून वाढत असते. काय बर असेल खर कारण? का बाहेर उत्तम शिकवणारा शिक्षक मुलाला काही सांगू शकत नाही ? तर याच खर कारण आहे त्यांचा त्यांच्या भूमिकांमध्ये होत असलेला गोंधळ. मुळातच व्यक्ती त्याच्या एकूण आयुष्यात कधीच एकच अशी भूमिका पार पाडत नसते. प्रत्येक व्यक्तीला त्याच्या आयुष्यात अनेक भूमिका निभावत पुढे जावं लागत असत. परंतु काही वेळा या अनेक भूमिका नेमकेपणाने, पाहिजे त्या ठिकाणी पाहिजे त्या वेळी पार पाडताना व्यक्ती कमी पडते आणि तेव्हा हा गोंधळ होतो. जस, जेव्हा राणे आपल्या मुलाला गणित शिकवायला जातात तेव्हा ते पूर्णपणे त्यांच्या शिक्षकाच्या भूमिकेत शिरतात. पण त्यावेळी ते हे विसरतात की त्यांच्या मुलासमोर ते आधी त्याचे वडील आहेत आणि नंतर एक शिक्षक. ज्या काही गोष्टी त्यांनी वडील या नात्याने मुलाला सांगितल्या पाहिजेत, समजावल्या पाहिजेत त्या काही प्रमाणात बाजूला राहतात आणि त्या नात्यातला ओलावा जाऊन एक प्रकारची पोकळी निर्माण होते. म्हणूनच बाहेर एक उत्तम शिक्षक असून ते आपल्या मुलाला समजावताना कमी पडतात.

आपल्या अनेकांच्या आयुष्यात अस नेहमी होत असत. आपण एकावेळी अनेक भूमिका निभावत असतो. या भूमिका म्हणजे एकप्रकारचा मुखवटा असतो. जो आपल्याला त्या त्या वेळी बदलत राहण्याची गरज असते . कारण अस न करण्याचे समस्या निर्माण होण्याची शक्यता असते. म्हणजे मी बाहेर उत्तम डॉक्टर आहे म्हणून हे गरजेचं नसत की मी माझ्या मित्रासोबत ही डॉक्टर म्हणूनच वागल, बोललं पाहिजे. मी एक उत्तम समुपदेशक असेन तर गरजेचं नसत माझ्या घरच्या लोकांनीही माझच ऐकुन त्याप्रमाणे वागल पाहिजे. अश्या अट्टाहासाने किंवा या भूमिकांच्या गोंधळाने समोरच्यावर आपला प्रभाव कमी पडतोच पण आपलं नातं बिघडण्याची शक्यता जास्त असते. म्हणून योग्य हेच ठरत की आपण कोणत्या परिस्थितीत कोणत्या व्यक्ती, समूह, नात्यामध्ये आहोत हे पाहून त्याप्रमाणे ती भूमिका पार पाडावी लागते. तेव्हाच  आपलं आयुष्य खेळकर आणि समाधानी होत.